Sezoni vjeshtë-dimër 2008, risjell në skenë dominimin e ngjyrës së zezë. Xhinset për femra do të jenë me prerje të drejtë dhe të mos harrojmë stilin e flokëve alla-Rihanna

Nëse duhet të jeni në modë për këtë sezon, duhet t’i bëni llogaritë mjaft mirë! Çmimet që mbizotërojnë në tregun kryeqytetas janë mjaft të kripura dhe të lënë me gojë hapur. Në çdo rrugë sheh vitrina dyqanesh që të mahnitin nga pamja që ofrojnë. Manekinë që mbajnë mbi trup veshje mjaft të bukura dhe që, padyshim, të tërheqin ta vizitosh dyqanin.

Gjatë një shëtitjeje nëpër butiqet e Tiranës, ajo që të binte në sy ishte larmia e veshjeve dhe padyshim çmimi i veshjeve, që në momentin që e dëgjoje përtypeshe me mjaft vështirësi. Edhe pse ne mund të konsiderohemi një vend i varfër, kur vjen puna për t’u veshur dhe për të ndjekur modën, jemi të parët që sakrifikojmë shumë.

Kryeqyteti numëron me dhjetëra butiqe që ofrojnë veshje nga firma të ndryshme, por edhe me çmime të kripura, të cilat nuk përballohen dot nga të gjitha shtresat shoqërore. Njerëzit, gjithnjë e më shumë po bëhen të ndërgjegjshëm, që një imazh i mirë transmeton tek të tjerët sukses dhe siguri.

Disa rregulla bazë dhe pak fantazi janë elementët e duhur për të qenë gjithnjë të paraqitshëm. Për të pasur një pamje perfekte, çdo njeri duhet të bëjë fillimisht një vlerësim real të vetes dhe të vishet me veshjen e duhur, e përshtatur kjo dhe në tendencat e modës. Kjo gjë vjen dhe në përshtatje me modën e vendeve të tjera lider në botën e modës, si Parisi, Londra apo Milano.

Sezoni dimëror 2008-2009, ndoshta do të shndërrohet në sezonin më klasik për sa u përket veshjeve, pasi ngjyra e zezë konsiderohet mbretëresha e klasit. Të gjithë ata që kanë dëshirë të jenë në koherencë me modën ndërkombëtare, duhet patjetër të përfshijnë në gardërobën e tyre ngjyrën e zezë.

Kjo ngjyrë do të shoqërohet nga grija, lejlaja, bluja, por sigurisht edhe këto ngjyra do të anojnë nga e errëta. Mbizotëruese në veshjet e përditshme të femrave do të jenë trikot praktike me materiale akrilike dhe të leshta. Pa dyshim që do mbizotërojnë edhe xhupat, por këtë vit do të jenë më të ngrohtë, pasi kanë përreth jakës së tyre gëzof.

Këtij viti i janë rikthyer dhe xhinset me prerje të drejtë, duke i dhënë fund tendencës së vajzave për t’i pasur xhinset sa më të ngushta nga fundi. Kryesuese e gardërobës së grave në karrierë, janë kostumet serioze të ndërthurur me materiale cilësore, si dhe me modele të kohës. Firmat, të cilave mund t‘u besosh krijimin e stilit individual janë të shumta në numër dhe të ofrojnë modele serioze, por edhe të kohës, që ndërthuren me elementin klasik, i cili duhet të jetë gjithmonë i pranishëm.

Kostumet seriozë, këtë vit do mbizotërohen nga copat e stofit me kuadrate, të stilit skocez. Për sa i përket kombinimeve, gjatë këtij sezoni, mundësitë do të jenë të shumta. E zeza, ngjyra mbizotëruese, i pranon të gjitha kombinimet dhe në këtë mënyrë do të ketë një larmishmëri veshjesh.

Jelekët do të vazhdojnë të jenë edhe këtë vit në gardërobën tuaj. Një jelek i zi me një këmishë të bardhë, do të ishte kombinimi perfekt i një dite normale, duke shtuar xhinset, blu e errët. Kombinime të shumta mund të krijohen edhe në kostumet me pantallona apo me fund, por edhe për aksesorët ndihmës si; çantat, të cilat duhet të kombinohen me ngjyrën e këpucëve, stolitë, e deri te krehja e flokëve, e cila duhet të përshtatet me veshjen.

Pavarësisht se tendenca e fundit ka qenë prerja e flokëve shkurt e tipit “Rihanna”, parukieret pohojnë se moda e flokut të gjatë nuk ikën kurrë. Pavarësisht tendencave të fundit të modës, veshjet sportive janë ato që gjithmonë i kanë rezistuar kohës. Kombinimi i tutave dhe bluzave të pambukta janë veshja perfekte e një dite jo shumë të ftohtë dimri.

Përsa i përket këpucëve, takat e larta do të jenë mbizotëruese, por nuk do të mungojnë dhe çizmet deri te kyçi i këmbës, me ngjyra si, gri, kafe, të zeza, jeshile, vishnje, lejla, që të ofrojnë mundësi kombinimi si me xhinse, ashtu edhe me veshjet klasike. Mbizotërimi i toneve të errëta, pothuajse krejtësisht e zezë, vlen dhe për meshkujt.

Ngjyrat

Sezoni vjeshtë-dimër, ka sjellë në qendër të vëmendjes ngjyrat e errëta, si për vajzat, ashtu edhe për djemtë. Kështu, për këtë sezon, ngjyrat, të cilat mendohet se do të tërheqin më shumë, por që kanë pushtuar pothuajse pjesën më të madhe të butiqeve në kryeqytet janë ngjyrat, gri, blu, kafe, lejla, vishnje dhe, pa dyshim, e zeza, e cila ndonëse është një ngjyrë klasike, nuk del kurrë nga moda.

Rruazat

Këto aksesorë, kohët e fundit përdoren shumë në veshje, po ashtu edhe në një pjesë të konsiderueshme të çantave. Ka stilistë që pjesën më të madhe të krijimtarisë së tyre e mbështesin mbi punimin me qëndisje, duke përdorur fije të ngjyrave të ndryshme, rruaza dhe gurë të ngjyrave të ndryshme. Kryesisht gurët dhe rruazat janë të vendosur në pjesën e përparme të veshjeve, sidomos në bluzat e leshta, duke bërë një kombinim të ngjyrës së trikove me gurët që do të vendosen mbi të.

Takat

Në qoftë se më parë nuk kishit mbajtur ndonjëherë taka të larta, këtë sezon duhet të mësoheni me idenë se ato nuk janë thjesht të larta. Këpucët dhe çizmet e këtij sezoni shkojnë deri në 15 centimetër lartësi. Atëherë, lamtumirë “shkurtësi”! Takat me këtë lartësi kanë edhe një pjesë ortopedike në pjesën e përparme të këpucës, që arrin deri në dy ose tre centimetër, për të mos lejuar një përkulje totale të këmbës dhe lehtësojnë në këtë mënyrë ecjen me këpucët “super të larta”.

Kapelat

Kapelat do të jenë tendenca më e fundit e modës për këtë sezon. Ato do të jenë protagoniste në gardërobën tuaj dhe do t’ju shoqërojnë përgjatë gjithë stinës së ftohtë. Ato të ofrohen në forma dhe ngjyra të ndryshme. Mbizotërojnë kapelat në formën e beretave, të cilat zënë një pjesë të konsiderueshme të hapësirës së kokës. Kapelat kanë mundësi të shoqërohen me shaje të ngjyrosura dhe me material të leshtë.

10 gjëra që duhet t’i dini për modën

1. Rifreskoni gardërobën kohë pas kohe.

2. Nëse mendoni se jeni të moshuar të vishni diçka, atëherë me siguri jeni të moshuar për atë veshje.

3. Mos u frikësoni të visheni me rroba që nuk janë të tipit tuaj.

4. Veshja me ngjyrë të zezë, çdo herë duket më e shtrenjtë, më joshëse dhe më e sofistikuar.

5. Nëse nuk jeni mirë nga ana ekonomike, atëherë mos dilni në shoping disa muaj.

6. Mos u brengosni për pamjen tuaj në një periudhë të caktuar kohe.

7. Çdo herë mundohuni të jeni më trendi dhe në hap me kohën.

8. Asnjëherë mos e sakrifikoni imazhin tuaj profesional për modën.

9. Moda është vetëm një pjesë sesi bota ju pranon.

10. Modë është çdo gjë rreth jush!

Këshilla

Nëse ju pëlqen diçka, dukeni bukur në të, atëherë blijeni!